صيانة العشرة آلاف كيلومتر للماروتى....عند الميكانيكى :)
سبحان الله مر عام كامل تقريبا منذ كنت هنا احكى عن شراء السيارة الماروتى، وبصراحة هى طوال العام السابق اثبتت انها سيارة المواقف الصعبة التى يعتمد عليها فى تحديات الاستخدام، زحام، جو حار، سفر، طرق مكسرة ومدقات، احمال، سرعات عالية بدون ان تبدى اى اعتراض ودون ان تحتاج لأى شى سوى البنزين وزجاجة مياه بطارية كلفتنى جنيهين ونصف طوال العام الماضى
عملنا بيها لحد يلوقتى 10 آلاف كيلومتر، لكن انا بعد تجربتى مع صيانة الألف فى التوكيل قررت ان هذا فراق بينى وبينهم، السيارة معى والميكانيكى صديقى وقطع الغيار فى المحلات ،فلا حاجة للتوكيل بزحامهم ومعاملتهم الغير مريحة وعملهم الغير متقن
بصيت على جدول صيانة العربية لقيت فيه زيت وفلتر وبوجيهات وتربيط العفشة ،اشتريت 3 كيلوجرام زيت شل ألترا بسعر 63 جنيه للكيلوجرام الواحد، وتوجهت الى ورشة الميكانيكى، واشتريت من محل قطع الغيار المجاور فلتر زيت فاج مصرى ب 14 جنيه و 3 بوجيهات ngk ب24 جنيه ، قام بتغيير الزيت والبوجيهات وراجع لى على الأبلاتين ولقاه بحالة ممتازة ،البوجيهات كانت خارجة من السيارة بحالة متوسطة(الشمعات بدأت فى الاصفرار، لكن دون اى رواسب كربونية)، بعد كدة قام بتربيط العفشة، وسالنى هو انت مربطتش العفشة دى من ساعة ما اشتريت العربية، قلت له انا ربطتها فى صيانة الآلف، اقسم لى بقبور اجداده انها سيبة تماما وان ده مش سيبان استخدام وانما سيبان عربية مرتبطتش فى التسليم وفى أول صيانة، وطلبت منه مراجعة عصاية الفتيس اللى بتضايق شوية فى الغيارات وبرضه لقاها سايبة تماما، المهم بعد ما خلص ركبت العربية وحسيت انى راكب عربية مختلفة تماما، حتى وهى زيرو مكانتش لا بنعومة المحرك دى ولا بجمال ومرونة العفشة دى، وحتى عصاية الفتيس بقت مريحة جدا بالمقارنة بالاول
التكلفة الاجمالية كانت : 189 جنيه زيت
14 جنيه فلتر
24 بوجيهات
50 جنيه مصنعيات
المجموع:277 جنيه
ولا الحوجة للتوكيل :)
